Receta/Si të përgatisni në shtëpi gliko tradicionale shalqini

Shqipëria është e njohur për glikotë e saj të mrekullueshme me fruta, por edhe me perime si patëllxhani apo edhe domatet, por ajo që pëlqehet veçanërisht, jo vetëm nga shqiptarët, por edhe nga të huajt është glikoja e shalqinit.

Glikotë më popullore janë edhe ato të arrave, rrushit pa fara, manave, kajsive, mollëve, pjeshkave, qershive të ëmbla dhe të tharta, portokalleve e qitrove, limonëve e mandarinave.

Ekzistojnë dy mënyra për përgatitjen e glikosë nga amvisat shqiptare:

Mënyra e parë

• 1 kg lëkurë shalqini

• 2 shkopa vanilie

• 2 limona

• 1 kg sheqer

Për të përfituar një reçel gliko sa më të mirë, së pari ju duhet një shalqi me lekurë të trashë, pasi ky reçel behet vetëm me të bardhën e lëkurës së shalqinit.

Pasi të qëroni pjesën e jashtme jeshile të tij, priteni pjesën e bardhë në copa 1 centimetër të trashë. Futini copat e shalqinit në tenxhere dhe ziejini për 10 minuta.

Ndërroni ujin e nxehtë me ujë të ftohtë dhe ziejini përsëri për 10 minuta.

Pastaj futni copat në tenxhere me ujë të ftohtë dhe i ndërroni ujin 6 – 8 herë për 24 orë.

Për një kilogram shalqi duhen 1 kilogram sheqer kaf, ose sipas dëshirës. Në tenxhere hidhet sheqeri dhe ujë sa të mbulojë nivelin e sheqerit.

Ziejeni deri sa të keni shërbetin e trashë e pastaj hidhen copat e shalqinit.

Më pas shtohet edhe vanilja dhe 2 limonat e shtrydhur. Ziejeni edhe për 20 minuta dhe fikeni zjarrin.

Hiqni shkumën dhe mbuloni tenxheren me napë deri sa të ftohet. Ruajeni në frigorifer dhe servireni të ftohtë

Mënyra e dytë

1 kg lëkura shalqini të qëruara

1 kg sheqer

1/3 lugë kafe me vanilie

1 limon (lëngun)

Për lëkurat e shalqinit

2 lugë supe me gëlqere

10 gota me ujë

Përgatitja

Pasi të qëroni pjesën jeshile të jashtme të shalqinit prisni pjesën e bardhë të lëkurave në kubikë.

Tretni 2 lugët e gëlqeres në 10 gota ujë dhe hidhni në të shalqinin e prerë në kubikë.

Lëreni shalqinin në ujin e gëlqeres për 2 orë dhe më pas kullojeni dhe shpëlajeni me ujë të rrjedhshëm.

Në një tenxhere hidhni pjesët e shalqini, sheqerin dhe lërini të ziejnë në zjarr te ngadaltë.

Pasi fillon të trashet shtoni vanilien, lëngun e limonit përziejini mirë dhe lërini edhe 7 minuta te tjera ne zjarr me temperaturë të ulët.

Hiqni nga zjarri dhe lëreni të ftohet plotësisht.