Sot para Vetingut gjyqtari Edmond Islamaj

Para Komisionit të Pavarur të Kualifikimit sot do të dalë Edmond Islamaj, gjyqtar në Gjykatën e Lartë. Trupi gjykues përbëhet nga Suela Zhegu, Pamela Qirko dhe Genta Tafa (Bungo). Seanca dëgjimore nis në orën 10:00.

Z. Edmond Islamaj ka lindur në 01.03.1969 në Kuçovë. Pas diplomimit si jurist në vitin 1992 ka filluar punë si gjyqtar në Gjykatën e Rrethit Gjyqësor Durrës, duke ushtruar këtë detyrë deri në maj 1993 kur është emëruar në detyrën e Kryetarit të Gjykatës së Rrethit Gjyqësor Sarande; në këtë gjykatë ka punuar deri në Gusht të vitit 1995, për të vazhduar më tej me detyrën e gjyqtarit pranë Gjykatës së Rrethit Gjyqësor Krujë. Në nëntor 1998 është emëruar Kryetar i Gjykatës së Rrethit Gjyqësor Kavajë deri në prill të vitit 2002 kur Z. Islamaj është emëruar në detyrën e Kryeinspektorit në Inspektoratin e Këshillit të Lartë të Drejtësisë.

Në dhjetor 2003 është emëruar gjyqtar në Gjykatën e Apelit Tiranë ku ka ushtruar detyrën e gjyqtarit deri në momentin e dhënies së pëlqimit të Kuvendit të Shqipërisë lidhur me dekretin e Presidentit të Republikës për emërimin në detyrën e Anëtarit të Gjykatës së Lartë, në qershor 2011. Krahas ushtrimit të detyrës së gjyqtarit Z. Islamaj ka kontribuar edhe në veprimtari të tjera të rëndësishme si; Anëtar i Këshillit të Lartë të Drejtësisë gjatë periudhës 2004-2010, anëtar i Komitetit Teknik të Projektit DANIDA në Shqipëri; pjestar i grupit të punës për hartimin e projektligjit “Për shërbimin përmbarimor në Republikën e Shqipërisë”, trajnues për Ligjin “Mbi të Drejtën tregtare” dhe pjesmarrës në grupin e punës për hartimin e Sistemit të Vlerësimit të gjyqtarëve në Strasburg pranë KE. Z. Edmond Islamaj ka marrë pjesë në trajnime të ndryshme të organizuara nga Shkolla e Magjistraturës si dhe nga vende të tjera të Evropës dhe Sh.B.A.së.

Edmond Islamaj ka një karrierë 25 vjeçare në sistemin gjyqësor shqiptar dhe është anëtari i parë i Gjykatës së Lartë që do të përballet me procesin e

Analiza e pasurisë është një ndër tre shtyllat e rivlerësimit për gjyqtarët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet ndryshimin e pasurisë së deklaruar të gjyqtarit Edmond Islamaj nga viti 2003 deri në fund të vitit 2015. 

Ky raport është prodhuar nga BIRN pas administratimit të deklaratave të pasurisë së këtij subjekti nga Inspektoriatin i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasurinë e gjyqtarëve dhe prokurorëve që i nënshtrohen procesit të vetingut.

Të dhënat e analizuara nga BIRN tregojnë se gjyqtari Edmond Islamaj zotëronte pasuri me vlerë 1.19 milionë lekëve në vitin 2003-kur deklaroi për herë të parë pasurinë. Në fund të vitit 2015, pasuria familjare e tij rezulton të jetë rritur me 9 herë në krahasim me vitin fillestar, duke kapur vlerën e 11.4 milionë lekëve.

Të ardhurat familjare të krijuara gjatë viteve 2003-2015 janë në vlerën e 26.5 milionë lekëve dhe përbëhen në 67 për qind nga paga dhe shpërblime nga funksioni, 25 për qind nga paga e bashkëjetueses si dhe 6.3 për qind nga të ardhurat nga qiratë.

Pasuria familjare e gjyqtarit Islamaj përbëhej në fund të vitit 2015 nga rreth 1.7 milionë lekë llogari bankare, 8.1 milionë lekë kursime në cash, një automjet si dhe rreth 1.1 milionë lekë pasuri të paluajtshme. Në këtë kategori është përfshirë edhe një apartament 71.5 metra katrorë i përfituar nga procesi i privatizimit në vitin 1993.

Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin artimetik/logjik të deklarimeve të subjektit si dhe “flamujt e kuq’  që identifikohen gjatë kontrollit. BIRN kreu kontrollin aritmetik/logjik mbi 12 deklarata pasurie të gjyqtarit Islamaj, të cilat rezultuan pa probleme.

Ndërkohë, gjatë analizës u identifikuan si “flamuj të kuq” mungesa e deklarimit të burimit për pasurinë e bashkëjetueses së zotit Islamaj në vitin 2005; e cila përbëhej nga një apartament banimi, një ambient për dyqan dhe një garazh, të deklaruara në vlerën e 1 milionë lekëve. Një tjetër “flamur i kuq” i identifikuar gjatë analizës së deklaratave të pasurisë është mbajtja jashtë sistemit bankar të kursimeve në vlerë akumulative prej 8.1 milionë lekësh.

Duke qënë se ky raport bazohet në të dhëna statistikore të analizuara nëpërmjet një databaze, ai nuk nxjerr përfundime mbi pasurinë e subjektit nëse ajo mbulohet me burime të ligjshme ose jo, por mëton të informojë publikun mbi pasurinë e deklaruar të zyrtarit publik nëpërmjet një formati të thjeshtë dhe të kuptueshëm grafik.