Panucci: Harrojeni sfidën me Kosovën, ja çfarë do bëjmë ndaj Ukrainës

Në prag të ndeshjes me Ukrainën, Christian Panucci ka dalë në konferencën për mediat ku ka folur për situatën në ambientin kuqezi, pas asaj humbjeje tronditëse ndaj Kosovës.

Trajneri i Shqipërisë theksoi se lojtarët janë të ndërgjegjshëm për atë “black out” që u ndodhi me Kosovën dhe të gjithë duam të tregojmë ndaj Ukrainës, se ne nuk jemi ata që u shfaqën në Zyrih.

Si është gjendja e skuadrës pas ndeshjes me Kosovën?

Kemi folur dhe jemi përballur, ndaj besoj se jemi të gjithë koshientë që kemi bërë një ndeshje të shëmtuar ndaj Kosovës. Jam i bindur që nesër do të nxjerrim në pah krenarinë dhe dëshirën për të bërë mirë dhe më pas do të shkojmë me pushime.

Ajo me Kosovën ishte menduar si më e lehta dhe kjo me Ukrainën më e vështira…

Nuk ka ndeshje të vështira apo të thjeshta. Në futboll ndodh që të përjetosh një “Black Out” dhe këtë përjetuam edhe ne me Kosovën. Kam parë në sy lojtarët e mi dhe jam i bindur që me Kosovën nuk ishin ata që unë njoh. Të gjithë ishin të mërzitur për paraqitjen dhe në të tilla raste, duhet ulur koka për të punuar dhe për të reaguar.

Nëse nuk vjen ky reagim as nesër, çfarë do të mendojë trajneri?

Pas ndeshjes do të flasim, por jam i sigurt që nesër do të bëjmë një ndeshje shumë serioze. Në futboll mund të fitosh dhe të humbësh, por jam i bindur që nuk do të përsëritet ajo që ndodhi me Kosovën.