'Do toleroni Vllazninë', Partizani vjen me këtë reagim zyrtar

Ekipi i Partizanit ka dalë me një komunikatë zyrtare pas ndeshjes me Vllazninë.

Skuadra e "demave" reagoi pas fitores me shkodranët me rezultatin 2-0. Në fakt, deklarata e kryeqytetasve ishte më shumë si një shfryrje ndaj të gjithë atyre që aluduan për tolerime të ndeshjes.

15 herë kampionët e vendit nuk i pranuan akuzat. Para ndeshjes pati aludime se klubi i kuq do të toleronte shkodranët, pasi nuk u pagua dhe gjoba për tifozët. Më pas, drejtuesit vendosen për të paguar gjobën. 

Deklarata e publikuar në faqen zyrtare të klubit është shumë e ashpër dhe drejtuesit e skuadrës së kuqe nuk i kapërdijnë akuzat për tolerime. "Demat" fituan ditën e djeshme me rezultatin 2-0 flaë golave të Jasir Asanit dhe Gerhard Prognit duke i dhënë një shkelm të fortë Vllaznisë në garën për mbijetesë.

Reagimi - "Klubi falenderon tifozerinë e kuqe të pranishme në stadium, për përkrahjen e madhe që dhuroj në mbështetje të ekipit në ndeshjen delikate luajtur të dielën ndaj Vllaznisë. Skuadra arriti të bindte në fushën e lojës duke rregjistruar një fitore të rëndësishme 2 – 0 për vetë objektivin që Klubi ka në këtë sezon futbollistik, pjesmarrjen në Kupat e Europës. Një rezultat i cili i dha përgjigjen e duhur të gjithë skeptikëve dhe zërave që aludonin për një tolerim të ndeshjes ndaj ekipit të Vllaznisë. Njëkohësisht Klubi nuk mund të pajtohet aspak me sulmet verbale ndaj lojtarëve tanë,të cilët para por edhe gjatë ndeshjes janë kontestuar nga individë të veçantë, duke cënuar personalitetin e tyre. Klubi e ka deklaruar përgjatë gjithë këtij sezoni se respekton fair – play in, duke luajtur ndershmërisht dhe pa u bërë pjesë e kompromiseve që prishin rregullat e lojës dhe parimet e garës. Partizani është dhe do të jetë gjithmonë pro garës së ndershme duke respektuar nga fillimi e deri në fund emrin dhe fanelën e kuqe", - përfundon reagimi i "demave".