VIDEO/ 613 kg kokainë në Durrës, 2 në pranga e një në kërkim. Ja emrat

Policia e Shtetit ka dhënë informacione në lidhje me zbulimin dhe hetimin e sasisë rekord të 613 kilogramë kokainë të kapur në Durrës.

Sipas kreut të Policisë së Shtetit, Ardi Veliu në pranga janë vendosur dy persona, ndërsa një i tretë është në kërkim. Bëhet fjalë për pronarin e kompanisë së bananeve.

Në pranga janë vënë:

Donaldo Lushaj

Armando Pezaku

Në kërkim:

Arbër Çekaj, pronari i ArbriGarden

Sipas Veliut, droga ka ardhur nga Kolumbia, transit në Itali dhe më pas anija ka mbërritur në Durrës në 19 shkurt 2018.

Kokaina ishte e fshehur në dyshemenë e dyfishtë të kontenierit.

Ajo është gjetur në 528 pako të mbështjella me letër natriban. Aksioni ka nisur mbrëmjen e datës 27 shkurt dhe po vazhdon.

Deklarata e plotë e Policisë së Shtetit:

Policia e Shtetit në bashkëpunim me Prokurorinë e Krimeve të Rënda dhe Drejtorinë e Hetimit Doganor, mbi bazën e informacioneve  të siguruara më herët dhe analizës së riskut, pas një pune të mirë organizuar dhe të koordinuar, ka arritur të finalizojë me sukses operacionin e koduar “Last Snow”.

Si rezultat i këtij operacioni u bë i mundur kapja dhe sekuestrimi i një sasie rekord prej 613 kilogramë e 350 gramë lënde narkotike e dyshuar kokainë, me vlerë tregu mbi 180 milion euro.

Hetimet kanë dokumentuar se lënda narkotike ishte nisur me kontenier nga Kolumbia duke kaluar tranzit përmes Italisë, në Maltë e më pas me anije ka mbërritur në Portin e Durrësit në Shqipëri, në datën 19 shkurt 2018.

Kokaina ishte e fshehur në kontenier me dysheme të dyfishtë, të ngarkuar me banane.

Operacioni ka nisur gjatë mbrëmjes së datës 27 shkurt 2018, në Portin Detar të Durrësit, në momentin që ngarkesa e ligjshme me banane, u mor në dorëzim nga firma porositëse “Arbri Garden” shpk, me pronar shtetasin A.Ç.

Sasia e lëndës narkotike ishte e paketuar në 528 pako, të mbështjella me letër natriban me kode të vendosura nga trafikantët.

Kontenieri i mbërritur në Portin e Durrësit, u mbajt nën vëzhgim të pandërprerë deri sa mbërriti në magazinat e firmës, nga strukturat e Policisë së Shtetit.

Shërbimet e Policisë kanë rrethuar në perimetrin e jashtëm objektin e më pas kanë ndërhyrë në brendësi të magazinës. Pas kontrollit të imtësishëm të kontenierit, kanë bërë të mundur gjetjen dhe sekuestrimin e lëndës narkotike.

Nga tërësia e veprimeve të kryera, rezultuan të përfshirë në këtë aktivitet kriminal shtetasit dhe u arrestuan në flagrancë:

- Donaldo Lushaj, 25 vjeç, lindur në Tropojë dhe banues në Tiranë;

- Armando Pezaku, 25 vjeç, lindur dhe banues në Durrës.

Gjithashtu u shpall në kërkim shtetasi A.Ç., pronari i firmës ku u sekuestrua lënda narkotike.

Autoritetet shqiptare po vijojnë hetimet ngushtësisht me partnerët e huaj për të zbuluar gjithë lidhjet dhe personat e përfshirë në këtë aktivitet kriminal.

Ndërkohë po vijon puna për evidentimin e pasurive të të arrestuarve dhe të përfshirëve në këtë trafik narkotikësh.

Policia e Shtetit është e vendosur të godasë me Forcën e Ligjit çdo paligjshmëri dhe aktivitet kriminal, për të ndërtuar një Shqipëri më të qetë e të sigurtë.