FOTO/ PD çon në Kuvend projekt-ligjin, tekste falas për nxënësit nga klasa e parë deri në të 9
Grupi Parlamentar i Partisë Demokratike, ka depozituar dy ditë më parë në Parlament, amendamentin që parashikon tekstet shkollore falas për nxënësit nga klasa e parë deri në klasën e nëntë.
“Shpenzimet për tekstet shkollore dhe ato ndihmëse të nxënësve në arsimin publik, nga klasa e parë deri në klasën e nëntë, mbulohen plotësisht nga buxheti i shtetit”, ky është propozimi i depozituar në Kuvend, nga Partia Demokratike, me 30 tetor.
Tekstet shkollore të paguara nga shtetit, ka qenë një propozim i Kryetarit të Partisë Demokratike, Lulzim Basha prej kohësh.
Qeveria vazhdimisht ka refuzuar ta marrë në konsideratë.
Shumë vende të rajonit e kanë këtë model, si dhe një pjesë e madhe e vendeve të BE.
Tekstet falas për nxënësit, do të ishin një ndihmesë për familjet e varfra shqiptare, që kanë një prej shpenzimeve më të mëdha të vitit blerjen e librave për fëmijët.
Më poshtë, gjeni amendamentin e depozituar dy ditë më parë në Kuvend.
REPUBLIKA E SHQIPËRISË
GRUPI PARLAMENTAR I PARTISË DEMOKRATIKE
Nr. _____Prot. Tiranë, më _____/_____/2017
DREJTUAR: ZOTIT GRAMOZ RUCI
KRYETAR I KUVENDIT TË SHQIPËRISË
OBJEKTI: PROPOZOHET PËR SHQYRTIM DHE MIRATIM NJË PROJEKTLIGJ
BAZA LIGJORE: Pika 1 e nenit 81 të Kushtetutës të Republikës së Shqipërisë dhe neni 68 i Rregullores së Kuvendit të Republikës së Shqipërisë.
Z. Ruci,
Shpërndarja e teksteve falas dhe mjeteve ndihmëse mësimore (fletore të modeluar për klasën e parë, fletore pune në lëndë të ndryshme, atlase etj), krijon mundësinë për të gjithë nxënësit të ndihen të barabartë, si dhe një lehtësim për punën e mësuesit, pasi pajisja me mjetet mësimore ndihmëse është kryer në një makth për shkak të kostos më të lartë që ato kanë krahasuar me vetë tekstin shkollor. Gjithashtu në kushtet e përhapjes së fenomenit të braktisjes shkollore, pamundësisë ekonomike, për shkak të varfërisë, dhënia e teksteve mësimore dhe atyre ndihmëse falas, do të ishte një masë që do të shërbente shumë në uljen e fenomenit të braktisjes shkollore si dhe në krijimin ë një klime shumë më pozitive në lidhjen mes shkollës-nxënësit dhe komunitetit të prindërve.
Për këtë arsye, bashkëlidhur ju dërgojmë për shqyrtim dhe miratim projektligjin “Për një ndryshim dhe shtesë në ligjin nr. 69/2012 “Për arsimin parauniversitar në Republikën e Shqipërisë”, sëbashku me relacionin shoqërues. Projektligji është iniciativë e deputetëve të Grupit Parlamentar të Partisë Demokratike.
Përsa më lart, kërkojmë nga ana juaj, vijimin menjëherë të procedurave të nevojshme parlamentare në përputhje me Rregulloren e Kuvendit.
KRYETARI
EDMOND SPAHO
REPUBLIKA E SHQIPËRISË
KUVENDI
PROJEKTLIGJ
Nr. ______/2017
PËR NJË NDRYSHIM DHE SHTESË NË LIGJIN NR. 69/2012 “PËR ARSIMIN PARAUNIVERSITAR NË REPUBLIKËN E SHQIPËRISË”
Në mbështetje të neneve 78, 81 pika 1 dhe 83 pika 1 të Kushtetutës, me propozimin e një grupi deputetësh,
KUVENDI
I REPUBLIKËS SË SHQIPËRISË
VENDOSI:
Në ligjin nr. 69/2012 “Për arsimin parauniversitar në Republikën e Shqipërisë”, bëhen këto ndryshime dhe shtesa:
Neni 1
Në nenin 47 bëhen këto ndryshime dhe shtesa:
a) Paragrafi 4 ndryshon si më poshtë vijon:
“4. Shpenzimet për tekstet shkollore dhe ato ndihmëse të nxënësve në arsimin publik, nga klasa e parë deri në klasën e nëntë, mbulohen plotësisht nga Buxheti i Shtetit”.
b) Pas pikës 4, shtohen pikat 5 dhe 6, me përmbajtje si më poshtë vijon:
“5. Në kuadër të marrëveshjeve dy palëshe në fushën e arsimit, Ministria e Arsimit të Republikës së Shqipërisë dhe Republikës së Kosovës, bashkërendojnë punën dhe bashkë financojnë koston e teksteve shkollore për fëmijët shqiptarë nga 6-16 vjeç, të cilët marrin mësim në gjuhën shqipe në diasporë.
6. Ministria përgjegjëse për arsimin nxjerr akte nënligjore për shpërndarjen e teksteve shkollore dhe ruajtjen e tyre, sipas dispozitave të këtij neni.”.
Neni 2
Hyrja në fuqi
Ky ligj hyn në fuqi 15 ditë pas botimit në Fletoren Zyrtare dhe i shtrinë efektet duke filluar nga viti shkollor 2018-2019.
Miratuar më _____/_____/2017.
KRYETARI
GRAMOZ RUCI