Ish shefi i diplomacisë shqiptare Besnik Mustafaj, i cili ështa afruar sërish pranë PD-së kohët e fundit ka konfirmuar në një intervistë se kriza politike në Shqipëri është drejt zgjidhjes.

“Eksperienca tregon se me kaq informacioni që po filtron në opinionin publik do të thotë se marrëveshje do të arrihet. Kjo marrëveshje merr garanci nga prania e amerikanëve. Propozimet që kam unë tregon se propozimet e McAllister është një platformë ndërsa tani po negociohet për ti dhënë marrëveshjes formë përfundimtare. Angazhimet e Bashës dhe të aleatëve tregon se duhet me qenë optimist”, tha ai për News24.

Mustafaj konfirmoi se tashmë po negociohet edhe shtyrja e zgjedhjeve pasi data 18 Qershor nuk është një opsion.

“Opozita ka kërkuar shtyrjen e zgjedhjeve për hir të implementimit të marrëveshjes. Sepse duhet përcaktuar statusi që do të kenë 4 ministrat teknikë, se cila do të jetë detyra e tyre dhe kujt do ti raportojnë ata”.

Duke komentuar protestën e opozitës, Mustafaj solli në vëmendje disa aspekte të arritjeve në 3 muaj: “Bilanci i kësaj proteste është pozitiv dhe këtë e them pa mëdyshje. Është arritur ndërkombëtarizimi i shqetësimeve të opozitës dhe kjo është një goditje për mazhorancën në afatmesëm. Është tregur një kapacitet i jashtëzakonshëm për të mbajtur gjallë një protestë 3 muaj.

Duhet energji të madhe njerëzore për këtë. Është arritur që të arrihet tek ky skelet propozimesh të cilat janë lëshime që bën qeveria përballë kërkesave të opozitës. Edi Rama ka treguar dritëshkurtësi politike. Shtyrja e zgjedhjeve në Kavajë ka qenë edhe një dobësi e qeverisë por edhe përpjekje për ti dhënë një mundësi zgjidhjes. Lëvizja e krerëve të policisë së rretheve tregoi dhe konfirmoi akuzat 2-vjeçare të opozitës sa i takon hashashit”.