Ish-ministri i Brendshëm dhe kreu i PS në Tiranë, Saimir Tahiri ka bërë sërish akuza pa adresë ndaj partive kundërshtare politike.

Gjatë një takimi me të rinjtë në Kamëz, Tahiri foli për “disa që nuk duan zgjedhje fare sepse kanë frikë, për disa që nuk duan zgjedhje sepse duan destabilitet”, e kështu me radhë.

Por, në asnjë rresht të fjalës së tij, Tahiri nuk përmendi as Partinë Demokratike apo as aleatët e tyre rivalë, LSI-në.

Është bërë rutinë tashmë që Saimir Tahiri përmend vetëm PS-në si e vetmja forcë politike që interesohet për shqiptarët dhe hedh akuza përse partitë e tjera (opozita) nuk duan të hyjnë në zgjedhje.

Mos ndoshta nuk është i informuar që kërkesa e opozitës për garanci në zgjedhje ka të bëjë pikërisht me kanabizimin e Shqipërisë gjatë kohës që ai ishte ministër i Brendshëm? 

Më poshtë, fjala e Saimir Tahirit:

Ka ca që nuk duan zgjedhje fare, sepse nuk duan të përballen me të vërtetat. Ka ca që nuk duan zgjedhje, sepse duan destabilitet. Ka ca që nuk duan zgjedhje, sepse duan ta mbajnë peng Shqipërinë. 

Ka ca që nuk duan zgjedhje, sepse duan më shumë gjyqtarët e korruptuar, sesa ju! Ka ca që nuk duan zgjedhje, sepse duan më shumë pushtetin e tyre, sesa pushtetin tuaj, pushtetin që ju takon ju. 

Ka ca që nuk duan zgjedhje, se duan karrigen e tyre, nuk duan mirëqenie dhe punësim për ju.

Por në 18 qershor këto rrugë do ndahen. Në 18 qershor, ose do shkojmë të futemi të gjithë bashkë në çadër, ose në 18 qershor do i tregojmë Shqipërisë që PS dhe Edi Rama vlen aq sa për ta çuar Shqipërinë përpara në rrugën që duhet.

Kush është sot 25 vjeç, ka lindur duke pasur Saliun në qeveri, në vitet ’90-të. Dhe është akoma sot që do të mbajë peng Shqipërinë. I njëjti njeri. Ne na duhet që ju, pikërisht ju, të rinjtë, të marrin në dorë fatin e tyre.

Një gjë është të rrini para televizorit dhe të shikoni sherrin në parlament apo të shikoni sherrin te çadra, apo të shikoni këdo që do të mbajë peng Shqipërinë, dhe një gjë tjetër është të vendosni të lëvizni vetë! 

Të lëvizni vetë, të dilni, të bëheni bashkë, të flisni me këdo që ka mundësi t’ju dëgjojë, të bindni këdo që ka arsye mjaftueshëm t’ju kuptojë. Dhe të bindni këdo që realisht beson se ka fuqi mjaftueshëm për ta bërë Shqipërinë. Dhe unë nuk kam asnjë diskutim që ju, këtu në Kamëz, bashkë me Sadriun, bashkë me këdo që angazhohet këtu, ju mund të ktheni faqen e historisë për Kamzën. 

Kamza ka mbetur peng 20 e kusur vite, por unë kam bindjen që kjo skuadër fituese që jeni këtu, bashkë me Sadriun, në 18 qershor do ktheni faqen e historisë për Kamzën.