Për ngjarjen e bujshme të implikimit direkt të eksponentit të lartë të Rilindjes, Saimir Tahiri, në një klan ndërkombëtar të trafikut të drogës, e cila po trondit politikën dhe opinionin publik ka reaguar, edhe  Ish-ministri i Brendshëm teknik, Dritan Demiraj. Ai e drejtoi dikasterin që u udhëhoq për gati katër vite nga Tahiri gjatë muajve  Maj-Gusht 2017, kohë e mjaftueshme për të parë në realit se çfarë kishte ndodhur me implikimin e policisë me organizatat kriminale shqiptare. Demiraj nëpërmjet një postimi në faqen e tij në Facebook ka konfirmuar për klanin e Habilajve se, “ata kanë pasur njerëzit e tyre në institucione”.

“Prej tre vitesh në detyra të ndryshme, edhe si Ministër i Brendshëm kam denoncuar me fakte, veprimtarinë korruptive dhe kriminale me qendrën e radarëve dhe bashkëpunimin e trafikantëve. Në shumë raste operacionet policore, nën drejtimin tim, përfundonin pa rezultat për shkak të fikjes së radarëve në QNOD. Përgjimet e klanit Habilaj njoftojnë, se ata kanë pasur njerëzit e tyre në institucione.

E vërteta do të dalë së shpejti në dritë të diellit dhe do të verbojë politikën e korruptuar.
Kjo histori fillon në muajin Tetor 2013, me tenderin e mirëmbajtjes së radarëve, moskryerjen e shërbimeve në to, firmosien e tenderave korruptive nga komandantët e Forcave Detare (nën drejtimin Sekretarit të përgjithshëm të Ministrisë së Mbrojtjes), gjë që ëoi në ngritjen e autostradës së drogës në Adriatik.

Në cilësinë dhe përgjegjësinë e shtetarit, kam ndarë çdo shqetësim dhe informacion me partnerët strategjike të vendit në mënyrë që të parandalonim një ditë këtë skandal.

E vërteta e skandaleve në Policinë e Shtetit, atyre që drejtuan dhe mundësuan trafikun e drogës, korrupsionit dhe lidershipit të Ministrisë se Mbrojtjes do të dalë së shpejti dhe fajtorët do të përgjigjen para ligjit, shkruan dhe denoncon Demiraj.