Një hipokrit i përvuajtur, në mes të Parisit!

Një hipokrit i përvuajtur, në mes të Parisit!

Nga SYRI.net - 02/09/2017

“A jam duke e ndihmuar popullin tim dhe vendin tim që t’u bëjë ballë këtyre sfidave (varfërisë dhe pabarazisë)? A jam duke e ndihmuar popullin tim që të bëjë një jetë më të mirë? Nuk është e lehtë, pa dyshim, por këto dy pyetje janë si dy yjet e mi orientuese”.

Këto ishin fjalët “mallëngjyese” të kryeministrit të Shqipërisë ditën e djeshme në Forumin “Global Positiv”, përpara shumë personaliteteve nga bota. Hipokrizia e një njeriu që drejton një shtet ku të varfrit vetëm zhyten në mjerim, kurse një grusht oligarkësh pasurohen në mënyrë të shfrenuar duket se nuk njeh as kufij, as cipë dhe as vrarje ndërgjegje.

Edi Rama nuk ka nevojë që të pyesë vetveten, nga mëngjesi deri në darkë (nëse vërtet e bën këtë gjë) se, a është duke e ndihmuar popullin e tij.

Shqiptarët, ndërkombëtarët po e po, si dhe ai vetë, përgjigjen e kanë ulëritëse në raportin e pak ditëve më parë, të institutit prestigjioz “Oxfam”.

Ky institucion serioz që merret me kërkime ekonomike për të gjithë vendet e botës, e ka renditur qeverinë e Ramës të katërt më të keqe në botë, për përpjekjet në luftën kundër pabarazisë.

Mes 154 vendeve të botës sipas angazhimit të tyre për të luftuar pabarazinë, qeveria shqiptare renditet në zonën e turpit, krahas vendeve si Nigeria, Bahreini dhe Mianmari.

Këto janë vende, pasuria e të cilave zotërohet nga një grusht i vogël njerëzish dhe ku qeveritë, jo vetëm që nuk bëjnë asgjë për të luftuar pabarazinë, por me politikat e tyre favorizojnë oligarkët.

Cinizmi dhe hipokrizia në shkallën më sipërore e shfaqur në mes të Parisit nga Edi Rama, merr kuptim kur këto fjalë (Të ndihmoj popullin tim, ylli im orientues!) i thoshte përpara përfaqësuesve të lartë të shteteve si Franca, Gjermania apo Austria, që sipas Oxfam renditen në vendet e para në luftën kundër pabarazisë.

Për kë mendon Edi Rama gjithë ditën; për ata qindra mijëra fermerë dhe fshatarë që u shkatërruan dhe u fundosën edhe më shumë në varfëri, pasi Edi Rama në vend që të investonte në sektorin më jetik për këtë vend, Bujqësinë, e shndërroi Republikën në një fermën më gjigante të parë ndonjëherë të kanabisit, kurse tani i ka rrethuar me zjarr?!

Apo për ata qindra mijë shqiptarët, që u kthyen në muhaxhirët më të shumtë të Europës duke jua kaluar në numër, edhe atyre që ikin nga shtëpitë prej luftës?!

Dhe ku e kujt ja thotë; Presidentit francez që vetëm pak javë më parë i dha ultimatum pikërisht për dyndjet e shqiptarëve në vendin e tij, që ikin prej këtu sepse Rama “mendon vetëm për ata…”.

Apo mendon për vendet e punës, që nuk i hapi kurrë ndërkohë që qindra milion euro në vend që ti investonte në ekonomi, i shpërndau për një grusht “biznesmenësh” me kompani fantazma-guackë në formë koncesionesh, që nuk kanë përmirësuar as një grimë shërbimet, por dinë vetëm të bëjnë dorëzime milionëshe te ai vetë dhe familjarët?!

Jep leksione Edi Rama për ekonominë dhe demokracinë në mes të Parisit dhe nuk i skuqet fare cipa që duket nuk e ka, edhe pse është i ndërgjegjshëm se të gjithë ata që e dëgjonin e dinë shumë mirë, që ajo Shqipëri dhe ajo demokraci për të cilat ai flet janë virtuale; “ekzistojnë” vetëm në mediat dhe kutitë e votimit të blera me paratë e drogës.

Një popull i varfër që milet nga një grusht oligarkësh të babëzitur si homologët në Afrikë dhe një kryeministër hipokrit, që krekoset në mes të Parisit…kjo është në fakt Shqipëria që mendon dhe projekton  e Edi Rama, nga mëngjesi në darkë!

SYRI.net

© SYRI.net

Lexo edhe

Komentet

zaho08/09/2017 18:01

I PACIPE DERI NE VDEKJE!!!

Arber03/09/2017 05:42

Rama ne ate Forum Global eshte si veshka ne mes te dhjamit. I zoti i shtepise eshte nje cirak i Rothchildeve. Ky Forum financohet nga Rothchildet (per te avancuar objektivat e Globalisteve), edhe Rama dihet eshte cirak i Soros (qe eshte edhe ky Qehaja i Rothchildeve) keshtu qe si i thone "jon bo grup fare"., Ata te gjithe aty per me tregu "rrena" jane mbledh, ckeni me Ramen? Te gjitha keto organizata apo bashkime politike ekonomike, sic eshte edhe BE, kane vetem nje hall. Moto eshte, mashtroni e ripeni popullin sa te mundni, cfare vidhni ndajeni me ne, ama sduam te degjojme se ska "stabilitet" (dmth po s'pati rremuja, protesta etj). Prandaj edhe shijne e grijne te gjithe ish komunistet ne kete vend 60+30 Vjet, sepse kane ortake "nderkombetaret". Mjere ata qe ushqejne iluzione per "demokracine Europiane". BE nuk eshte asgje tjeter por ish Bashkimi Sovietik, me baze teorine e "Sovranitetit te Kufizuar" te Brezhnjevit = skllaveri.

Sokoli02/09/2017 21:24

Fjalë dhe vetëm fjalë plot hipokrizi. Asgjë më tepër. Ky ka humbur aftëtësinë për të qënë i sinqertë, i vërtetë apo i ndershëm. Vëtëm përrallis dhe argëton, mendon shoku me pantofla, të tjerët me batakçilleqe që s'i han as qeni. Ia nxiu faqen Shqipërisë, por u kërkoi europianëve të na rregullojnë imazhin!? Turp dhe faqe e zezë plus vajmedet nga kush drejtohemi...

Kuqo02/09/2017 17:05

Duhet nje Avni Rustem i Ri...

Daj Jaku02/09/2017 16:57

Duke dëgjuar EDram?n francezët nxihen nga smira që shqiptarët kanë për udhëheqës një njeri kaq të madh ndërsa ata nuk e kanë këtë fat. "Kushedi se si do na kishte rilindur po ta kishim patur atë fat. Sa gabim që nuk e mbajtëm kur e kishim në mes tonë kur shkarraviste trotuaret dhe poshtë urave të Parisit". Harrojeni o francezë, ju a morëm dhe nuk ju a kthejmë më. Vërtet jemi të fundit në botë por nuk mërzitemi, kemi EDramën udhëheqës si dhe sigurinë se më keq se kaq nuk kemi ku shkojmë. Se po ta kthejmë listën kokposhtë dalim të parët. Dhe EDrama e kthen kokposhtë listën sa hap e mbyll sytë, pa e kuptuar fare, bile as ai vetë, është xhongler. Edhe piplli e beson. Bile edhe ai vetë e beson rrenën e vet. Sëmundja mendore e gënjeshtarit patolligjik.

Shto koment

Denonco