Sot është një ditë e vështirë për Partinë Demokratike. Ajo sikurse pritej, ra poshtë nivelit të 30% të votave dhe po i afrohet rezultatit të vitit 1997. Ky është një moment krize të thellë, një moment trishtimi për çdo opozitar të këtij vendi por edhe një oportunitet për një ringritje të re.

Megjithëse votuesit historike të PD-se nuk dolën në votime, e mira është se ata nuk u shitën, nuk u gënjyen nga partitë autoritare dhe korruptive. Ata janë aty në pritje të një lidershipi të ri që do i japë PD-së një fytyre europiane, morale dhe modernizuese.

Veçse këtë radhë duhet të jetë ndryshe. Duhet të ketë një statut të ri që vendos garën dhe votën masive në çdo nivel, për çdo përfaqësim. Njerëzit duan forcë, substancë, qëndrueshmëri, energji misionare si në fillim vitet '90. Njerëzit duan opozitë të vërtetë jo flirt për pushtet, njerëzit duan të nxirret nga shtëpia e kësaj partie historike fantazma e partive të majta, e aleancave dhe marrëveshjeve të fshehta me ta.

PD ka një bazë elektorale prej afro një milioni shqiptarësh dhe përmes një rinovimi konkurrues, të drejtë dhe të ndershëm, mund të gjejë forcën për të dalë sërisht në krye të skenës politike.

Optimist tek ringritja e kësaj force politike. Ka rrënjë të mira bazuar tek idealizmi, drejtësia dhe liria. Ka rrënjë tek rezistenca ndaj regjimeve diktatoriale, por pasuritë e saj intelektuale dhe politike janë izoluar dhe përjashtuar nga përfaqësimi politik në nivele të larta. Ato nuk u përdorën as në këtë fushatë.

PD ka nevojë të hapet përmes garës së ndershme, të pastrohet nga degët e kalbura, nga korrupsioni dhe falsodemokracia dhe të fillojë procesin e ringritjes nga anëtarësia dhe simpatizantët e saj që partine e shohin si forcë të transformimit të Shqipërisë, jo si një lopë që e mjelin çdo mëngjes...