Kryeministri Edi Rama, edhe pse e ka miratuar ligjin për importin e mbetjeve, nuk ka ditë që publikisht ose privatisht  të mos takohet me biznesmenët e riciklimit në vend. Por përveç këtyre takimeve, kryeministri nuk lë rast pa e përmendur këtë çështje, nëpër lëndina me të ashtuquajturit fermerë, në Asamblenë e partisë, nëpër studio televizive, gjithë natën në faqen e tij në FB, pra ku të mundet 24 në 24 orë.

I gjithë ky impenjim i “çuditshëm” si “kofini pa të vjelit” ngjan me atë fenomenin psiqik të kriminelit, i cili kthehet vazhdimisht në vendin e krimit.

Edhe sot në takimin me ricikluesit dhe krerët e bashkive, kryeministri Rama i shtrënguar deri në teatralitet, bëri  ironi me akuzat e opozitës se ai është paguar në shifra të mëdha për të kaluar këtë ligj, të cilin 3 vite më parë e cilësonte si në shërbim të mafies dhe antishqiptarë.

 Rama gjeti rastin dhe lëshoi nga subkoshienca e tij, pikërisht atë që duket se e shqetëson më shumë, pavarësisht se çdo ditë përpiqet më kot ta justifikojë; përse u detyrua të ndryshojë në një kohë të shkurtër mendim 100%, për këtë ligj dhe biznes.

Duke iu drejtuar kreut të Shoqatës së Ricikluesve, Bardhyl Baltzës ai tregoi edhe merakun që ka:

“Mirë që keni bërë gjithë këto të këqija, dhe mua më keni dhënë 4 milion euro, por keni krijuar edhe gjithë këtë histeri.’

Këtij shqetësimi të kryeministri, ju përgjigj kreu i shoqatës po në të njëjtën linjë:

“Po, na i ktheni mbrapsht, ato para”.

E gjitha duket si një shkëmbim batudash ironike drejtuar atyre që kundërshtojnë importin e plehrave në Shqipëri, por në fakt në këtë dialog fshihet edhe thelbi dhe shpjegimi se përse vetë kryeministri personalisht, 24 orë në ditë është vënë në krye të mbrojtjes së këtij biznesi, i cili ndryshe nga sa thotë ai, zë nje vend fare të papërfillshëm në zhvillimin e ekonomisë sonë.

A ka ai interesa të tijat që tejkalojnë ato të 10-15 fabrikave që përpunojnë letër, plastikë etj?

Koha do ta vërtetojë këtë shumë shpejt.

Sipas specialistëve që kanë studiuar ligjin, pritet që në vend të nisë së shpejti ndërtimi i dhjetra fabrikave të tjera, pasi lënda e parë është me bollëk nëpër Europë dhe ky ligj që mbron Rama, nuk ka bërë asnjë kufizim për sasinë që do të importohet drejt vendit tonë.

Pra mesazhi që i dhanë ata që janë mbrapa gjithë kësaj sot Edi Ramës ishte: Nuk ka kthim mbrapa, përndryshe na kthe mbrapsht “lobimin” tonë gjigant…

/Syri. net/