Një person është shpallur në kërkim policor pasi është kapur duke fotografuar votën.

Burime nga policia bëjnë me dije se është kërkuar ndërhyrja e Policisë në qendrën e votimit nr 3665/1, nga Komisioni i Qendrës së Votimit.

Rreth orës 14.30 është marrë njoftim nga Komisioni i Qendrës së votimit nr.3665/1, e cila ndodhet tek Shkolla 9-vjeçare “Sotir Gurra”, ZAZ 72, se është bllokuar procesi i votimit pasi nga anëtarët e komisionit të qendrës së mësipërme është konstatuar një person, i cili po fotografonte votën e tij, sqaron Policia lokale.

Kjo ka bërë që komisionerët të kërkojnë ndihma e Policisë së Shtetit.

Pas marrjes së vendimit, shërbimet e Policisë kanë hyrë në qendrën e votimit ku nga kryerja e veprimeve të para, rezulton se E.K, 29 vjeç, banues në Korçë, pasi është regjistruar, ka marrë fletën e votimit dhe ka shkuar tek vendi i fshehtë.

Pasi ka kryer veprimet ka bërë fotografimin e fletës së votimit, veprim që është parë nga anëtarët e komisionit. Personi të mësipërm i është bllokuar nga Komisioni, fleta e votimit dhe në këtë moment ky i fundit, menjëherë është larguar nga Qendra e Votimit.

“Nga ana e Policisë, në konsultim me Prokurorinë e Rrethit Gjyqësor Korçë, u kryhen veprimet e para proceduriale në lidhje me këtë ngjarje dhe po punohet për kapjen e tij. Sqarojmë se procesi i votimit në këtë qendër, ka rifilluar normalisht, pas përfundimit të kryerjes së veprimeve procedurale”, sqarojnë burime zyrtare nga Policia.