Gjykata e Elbasanit ka vendosur të pranojë kërkesën e Prokurorisë për ndryshimin e akuzave ndaj të pandehurit Shkëlzen Hasanpapaj, i arrestuar si i dyshuar për tentativën e vrasjes në qershor të 2016 ndaj dy anëtarëve të fisitg Çapja, Florenc Çapja dhe Bledar Muçadhe i esktraduar nga Hollanda në vitin 2017.  Mësohet se gjyqtari Sulejman Kurti pranoi kërkesën e prokurorisë së Elbasanit për ndryshimin e akuzës dhe kalimin e çështjes për gjykim për akuzat  e “Vrasjes në rrethana të tjera cilësuese në mënyrë të rrezikshme për jetën e shumë personave” mbetur kjo në tentativë dhe “Armëmbajtje pa lejë”. Veç ndryshimit të akuzave, gjyqtari i Elbasanit Kurti vendosi që çështja të kalojë për gjykim.

Me këtë vendim, gjykata ka rrëzuar tre akuzat për “Kanosje me armë”, “Armëmbajtje pa lejë” dhe “Plagosje të lehtë me dashje” që prokurorja Eliverta Murra kishte ngritur ndaj të pandehurit Shkëlzen Hasanpapaj.

Lidhur me ndryshimin e akuzave, Drejtoria e Inspektimit pranë Prokurorisë së Përgjithshme ka nisur verifikimet për prokurorët Neritan Hoxha, Fatmir Lushi dhe Eliverta Murra. I pari që ka hetuar këtë dosje është prokurori Neritan Hoxha.

Më pas ky i fundit është larguar duke hyrë në këtë hetim prokurori Fatmir Lushi. Por edhe ky i fundit është larguar dhe dosja e atentatit mafioz kundër Florenc Çapjas dhe Bledar Muçës, ka qenë më pas në dorë të prokurores Eliverta Murra. Objekt i kontrollit janë dhe veprimet e ish-drejtuesit të kësaj prokurorie Dritan Gina, i cili ka menaxhuar procedurën e ndërrimit të prokurorëve, derisa në fund çështjen e ka pasur në dorë prokurorja Eliverta Murra, e cila në 27 dhjetor 2017 ka mbyllur hetimet duke akuzuar Hasanpapaj për tre akuzat “Kanosje me armë”, “Armëmbajtje pa lejë” dhe “Plagosje të lehtë me dashje”.