Presidenti Donald Trump u tha studentëve të një universiteti të krishterë të ndjehen krenarë që nuk bëjnë pjesë në rrymën qendrore të opinionit publik.
Me komente që dukej se i referoheshin elitës politike në Uashington, presidenti tha në fjalimin që mbajti para diplomantëve të Universitetit “Liberty”, universiteti më i madh i krishterë në vend, ta përqafojnë me zell statusin e tyre si zëdhënës të pikëpamjeve larg qendrës, pasi ata që nuk janë konformistë “janë ata që ndryshojnë botën”.
Fjalimi në Universitetin “Liberty” ishte dalja e parë para publikut që kur presidenti shkarkoi drejtorin e FBI-së, James Comey, i cili po drejtonte hetimet mbi rolin që mund të ketë luajtur Rusia në zgjedhje dhe kontaktet e mundshme që dyshohen të kenë pasur punonjës të fushatës Trump me qeverinë ruse.
Presidenti i mëshoi mesazhit kundër qarqeve politike të Uashingtonit, duke thënë se e kishte parë me sytë e tij se sistemi nuk funksionon dhe u bëri thirrje 18 mijë diplomantëve t’u bëjnë qëndresë zërave të dështuar që “mendojnë se dinë gjithçka”.
© SYRI.net