Qindra leopardë dëbore janë duke u vrarë nga kontrabanduesit çdo vit në vargjet malore të Azisë, kjo sipas një raporti të ri i cili thotë së një nga arsyet kryesorë të vrasjeve janë sulmet ndaj bagëtive.

Është vlerësuar se tashmë vetëm 4,000  nga këto krijesa elegante por pakapshme kanë mbijetuar  në 12 shtete në rajonin e Himalajeve dhe në Tibet.

Ekspertët thonë se rreth 221-450 leopardë dëbore janë vrarë për çdo vit prej vitit 2008, të paktën 4 leopardë për çdo javë, shkruan “BBC”.

Por në raportin e publikuar nga Traffic, thuhet se numri i kafshëve të vrara “mund të jetë më i lartë” pasi që vrasjet nëpër zonat e largëta nuk mund të regjistrohen.

Ky rrjet ka gjetur se shumica e leopardëve  janë vrarë për shkak të sulmeve ndaj bagëtive (55 për qind), ndërkaq, 21 për qind e tyre janë vrarë për tregtinë ilegale të gëzofit dhe produkteve të tij.