Në sallën “Rozafa” të Shkodrës këngëtarja Tefta Tashko, e shoqëruar në piano nga Lola Aleksi, më 11 Dhjetor 1936 dha koncertin e saj recital me pjesë klasike dhe këngë shqiptare. “Publiku shqiptar shkruante shtypi i kohës, i mbuloi këngët e Teftës me rrebeshe duartrokitjesh”. Të nesërmen e përsëriti koncertin e saj, vetëm për nxënëset shkodrane. Shfaqja u dha falas dhe kjo flet shumë për karakterin e krijimtarisë së këngëtarëve tanë të kësaj periudhe, kur hidheshin hapat e parë të muzikës sonë. /qmksh